mi pali e lipu ni lon tenpo sike pini, ni li sike #2023 li mun #6 li suno #23. (a mi kama lukin e nanpa lon tenpo ni la nanpa suno li sama a - nasa musi a! sike wan en suno wan li weka tan tenpo ni.) taso ni la mi pana kepeken ilo lipu Kuko taso. tenpo suno ni la mi kama wile ken pana pi nasin pona e ona, mi ma lipu mi e ona.
toki pona li sama toki ante. ona li toki. jan li toki kepeken ona. taso kin la sama toki ante la nasin sona li lon. mi sona e toki sin la mi ken pilin e ijo e sona e ale kepeken nasin sin.
toki la nasin sona la nimi li suli mute. ni li suli a: nimi seme li lon? ijo seme la nimi li lon li lon ala? nimi la nimi ante seme li lon li sama mute li ante lili seme? toki ale la ni li ante. toki pona la ante li suli a tan ni: nimi mute li lon ala. mute nimi li lili nasa. toki ante ala la nimi li mute lili sama toki pona. la nasin sona li ante mute lon toki pona.
toki Inli en toki mute la nimi li seme? ijo sin li kama lon la jan li pali e nimi. nimi li wawa ni: jan li kute e nimi la sona ale pi ijo nimi li kama lon pilin. anu seme? lon la ala. jan li ken ala sona e nimi ale. tenpo ale la ijo sin li kama la nimi li kama mute ike. la jan li kute e nimi li sona ala la ona li seme? ona o toki e ni: “mi sona ala. nimi ni li seme?” taso ken la jan li wile ala pana e tenpo tawa alasa sona. ken la jan li wile toki ala e ni: ona li sona ala e ijo. la ona li kute e nimi poka li pilin e sona. la ona li sona e nimi. taso sona ni li ken pakala. [nimi li ken len e sona.] jan ante la sona nimi li ken ante. jan ante li kute e nimi sama la sona pi ijo ante li ken kama lon pilin. pakala.
lon la nimi li wawa ni: jan li sona ala e ijo li sona e nimi ijo taso la jan li awen ken toki e ijo. ken la jan li kama sona lili e nimi tan kute li sona suli ala li pilin e ni: ona li sona. ona li ken a mu e nimi kepeken sona lon ala. nimi li len e weka sona. jan kute li ken pilin e ni: jan li toki kepeken sona. ken la jan ni kute li kama pilin e ni: ona a li sona! jan sin li kama mu pi sona ala. pakala li kama suli.
toki pona li utala e pakala ni. nimi li mute lili la jan li ken a sona e nimi ale. taso nimi ale li pana e sona lili. mi toki e sona tawa sina la sona li ken ala tan nimi wan pi sona suli. la nimi mute pi sona lili li kama wan li kama sona. mi o wan e nimi tawa sona kepeken sona lon a. sina awen ken sona ala. taso sina ken ala len e weka sona kepeken nimi.
toki pona la, mi sona ala e ijo la mi ken ala toki e ona. mi mu ala e nimi suli kepeken sona ala. sina sona ala la sina sona e weka sona sina.